ENQERE - Hevserokê Giştî yê ÎHD’ê Huseyîn Kuçukbalaban diyar kir ku ji bo pêvajo baş derbas bibe divê ji bo Rêberê Gelê Kurd Abdullah Ocalan rayeya efûya taybet were bikaranîn.
Bi ser “Banga Aştî û Civaka Demokratîk” a Rêberê Gelê Kurd Abdullah Ocalan re mehek û 20 roj derbas bûn lê hêj jî dewletê gavên şênber neavêtine. Hevserokê Giştî yê Komeleya Mafên Mirovan (ÎHD) Huseyîn Kuçukbalaban diyar kir ku ji bo pêvajo baş pêş bikeve dibe ku Serokkomar Tayyîp Erdogan ji bo Rêberê Gelê Kurd Abdullah Ocalan rayeya xwe ya efûya taybet bi kar bîne
Kuçukbalaban, cihêkariya di pergala edaletê de rexne kir û got: “Dayikên 84 salî di girtîgehê de tên ragirtin. Lê kesên mirov kuştin bi hinceta tenduristiyê tên berdan. Kurd û sosyalîst rastî vê cihêkariyê tên. Serokkomar herî dawî ji bo 10 kesan biryara efûya taybet da. Di xala 104’emîn a Destûra Bingehînd e ev rayeye ji serokkomar re hatiye dayin. Ji sala 1982’yan heta niha serokkomaran bi giştî ji bo 450 kesan ev rayeye bi kar anîne. Herî zêde jî bi 263 kesan Ahmet Necdet Sezer ev rayeye bi kar anî. Li gorî daneyên ÎHD’ê, serokkomarê heyî jî ji sala 2014’an heta niha der heqê 30 kesan de ev rayeye bi kar aniye. Ev rayeya efûyê, ji bo kesên nexweş, astengdar, kal û hwd. dikare bê bikaranîn.”
'KESÊN BIQESDÎ MIROV KUŞTIN HATINE BERDAN’
Bi domdarî Kuçukbalaban, wiha got: “Îktîdarê ne kesên ‘sûc li dijî dewletê kirin’ lê yên li dijî mirovahiyê sûc kilrin tehliye kir. Dixwazim çendek mînakan bidim; girtiyekê 45 salî ku ji ber kuştina biqesdî û bikaranîna çeka bêrûxset hatibû girtin, bi rayeya efûyê ya serokkomar hate berdan. Her wiha kesekî 43 salî ku ji kuştina biqesdî hatibû girtin jî hate berdan. Li gel van, korgeneralekî ku ji ber Darbeya 28’ê Sibatê hatibû girtin jî hate efûkirin. Balkêş e ku Mehmet Emîn Alpsoy ê di çarçoveya Doza Hîzbûllahê de û faîlê cînayeta Mehmet Sîncar jî di 2023’yan de bi biryara serokkomar hate efûkirin. Kurê Alpsoy jî bi heman awayî hate tehliyekirin.”
'LI GIRTÎGEHAN DAYIKÊN 84 SALÎ HENE’
Kuçukbalaban, bi bîr xist ku herî dawî jî Cîgirê Sekreterê Giştî yê Şaredariya Bajarê Mezin a Stenbolê Mahîr Polat ji ber pirsgirêkên tenduristiyê bi rapora ATK’ê hatiye berdan. Kuçukbalaban, got: “Binêrin, dayikên 84 salî yên girtî hene. Her wiha endama Komîsyona Girtîgehan a ÎHD’ê ya 70 salî Hatîce Onaran tevî nexweşiyên xwe girtî ye. Mixabin tevî hewldanên me jî ji bo van rayeya efûyê nehat bikaranîn. Li gorî rapora me ya 2022’yan; 651 jê rewşa wan giran bi giştî hezar û 517 girtiyên nexweş hene.”
‘DIVÊ SERERASTKIRIN ÇÊBIBIN’
Kuçukbalaban, anî ziman ku pêvajoya heyî xwedî wateyeke dîrokî ye û axatina xwe wiha qedand: “Jixwe CPT û DMME û komîte û dadgehên Tirkiye jî aliyekê wan e girtîgehên bi cureya hucreyên yekkesî weke îşkencexane pênase dikin. Anku heke hûn bixwazin meseleyeke wiha çareser bikin, di serî de divê hûn rayeya efûya taybet ji bo aktorê sereke yê vê pêvajoyê Abdullah Ocalan bi kar bînin. An hûn ê efûya giştî ragihînin an jî ji bo pêvajo baş pêş bikeve rêbazekî din bicebirînin ku berdana girtiyên nexweş jî di nav de. Divê tavilê di vê mijarê de sererastkirinên qanûnî bên çêkirin.”
MA / Omer Gungor