WAN - Hevşaredara Şaredariya Erdîşê ya DEM Partiyê Guler Temel got ku ji dema ku şaredarî ketiye destê wan heya niha gelek projeyên li ser esasê jin û zarokan pêk anîne û tevî 600 milyon deynî jî, wan xizmeta giştî paşguh nekiriye.
Şaredariya navçeya Erdîşê ya Wanê xizmetên girîng dike. Partiya Wekhevî û Demokrasiyê ya Gelan (DEM Partî) ku piştî 8 salan şaredariyê ji qeyûm ê 600 milyon lîre deyn hişt wergirt, tevî deynan jî xizmeta gel dike. Hevşaredara Şaredariya Erdîşê Guler Temelê behsa karê ku ji dema ku wan rêveberiyê wergirtiye kir.
Guler Temelê diyar kir ku wan şaredariyek ku di nav deynan wergirtiye û got: "Di qaseya şaredariyê de hezar û 500 TL hebû. Armanca wan ew bû ku şaredariyê û gel bera hev bidin. Dixwestin kesên ku dengê xwe dane DEM Partiyê bi bêxizmetiyê ceza bikin."
Guler Temelê destnîşan kir ku Şaredariya Erdîşê ji kapasîteya xwe zêde xwedî kadroyeke xebatkaran e û got: "Diviyabû 350 xebatkarên şaredariyê hebûna, lê 500 xebatkarên wê hene. Nûkirina çayxaneyeke şaredariyê jî di çarçoveya 'tevdîrên etserifê' de nayê qebûlkirin. Bi vî awayî xebatên me tên astengkirin. Gelek avahiyên şaredariyê tehsîsî saziyên din kirine. Me bi biryara meclisê ev yek betal kirin. Lê mixabin tehsîsa yek ji van mal û milkan nehat kirin."
ÇI HATIN KIRIN?
Guler Temelê anî ziman ku wan di warê jin û zarokan de gelek plansazî kirine û ji van planan hin jê pêk anîne û got: "Li navçeyê 150 tax hene. Heya niha me li 30 taxan xebat kiriye. Me îhaleya 250 hezar metrekare kevirên parkeyî kir û me niha li gelek taxan ev xebat qedandiye. Li Erdîşê pêdivî bi çêkirina 400 kîlometre rê heye. Em li taxan civînên jinan û gel li dar dixin. Em prisgirêkan tespît dikin û bi hev re çareseriyê dibînin."
Guler Temelê destnîşan kir ku gelek xebatên ji bo jinan kirine û got ku pergala hevserokatiyê loi bara gel xwedî wateyeke mezin e.
Gulerê bilêv kir ku jinên ku serî li navenda şêwirmendiyê didin di warê aborî, derûnî û gelek warên din de piştgiriyê dixwazin û got ku li dijî tundiyê êdî cihekî jinan heye.