Partiya Herêmên Demokratîk (DBP) bi boneya salvegera 110’emîn a Qirkirina Ermenan ku di 24’ê Nîsana 1915’an de dest pê kiribû, daxuyaniyeke nivîskî weşand. Di daxuyaniyê de hate gotin ku Partiya Îttîhat Terakiyê ku yekperestî dikir, rê li ber karesatên mezin û êşên giran vekiriye. Bi domdarî hate gotin ku di van sedsalan de dewlet li şûna bi vê trajediyê re hevrû bibe, xwedî lê derketiye û faîlên tundiya kolektîf gelek caran hatine xelatkirin. 

 

BANGA ‘HEVRÛBÛNÊ’

 

Di berdewamê de hate diyarkirin ku nasname û baweriyên cuda li Tirkiyeyê weke gef tên dîtin û polîtîkayên sirgun, pişaftin û komkujiyan bûne xala hevpar a hemû îktîdaran. Bi domdarî wiha hate gotin: “Di vê çarçoveyê de dê têkoşîna me ya ji bo rastiyên dîrokî derkevin holê û hevrûbûnek çêbibe bidome. Em êşa gelê Ermen parve dikin û ji bo ev êş êdî neyên jiyîn jî banga berpirsyartiyê li her kesî dikin.” 

 

BAROYA AMEDÊ DAXUYANÎ DA 

 

Baroya Amedê jî bi heman boneyê li ser hesaba xwe ya medyaya dijîtal daxuyanî da. Baroyê, got ku Komkujiya Ermenan ne tenê ji bo Ermenan, di hafizeya tevahiya civakê de rê li ber birînên giran vekiriye. Baroyê, da zanîn ku li dijî êşên gelê Ermen jiyayî edalet cîbicî nebûye. Baroyê, hemû kesên di Qirkirina Ermenan de jiyana xwe ji dest dane bi bîr anî û xwest ku dewlet bi vê qirkirinê re hevrû bibe û hesabê bide. Herî dawî jî baroyê banga destpêkirina pêvajoya derxistina heqîqetan kir.